मानव विकास बसचा भीषण अपघात; १२ विद्यार्थिनी जखमी

जळगाव जामोद: मानव विकास बसचा भीषण अपघात; १२ विद्यार्थिनी जखमी

​जळगाव जामोद (प्रतिनिधी):

एसटी बसच्या दयनीय अवस्थेचा फटका पुन्हा एकदा शालेय विद्यार्थिनींना बसला आहे. जळगाव जामोद आगाराच्या मानव विकास मिशनच्या बसने एका उभ्या आयशर ट्रकला पाठीमागून जोरदार धडक दिली. या भीषण अपघातात बसमधील १२ विद्यार्थिनी किरकोळ जखमी झाल्या असून, जळगाव-आसलगाव मार्गावरील सुपो जिनिंगजवळ आज सकाळी ११ वाजेच्या सुमारास ही घटना घडली.

​नेमकी घटना काय?

​जळगाव जामोद आगारातून तालुक्यातील कुरणगाड येथे विद्यार्थिनींना घेऊन जाणारी मानव विकास मिशनची बस मार्गस्थ असताना चालक नियंत्रण सुटला. परिणामी, ही बस रस्त्याच्या कडेला असलेल्या आयशर ट्रकवर जाऊन आदळली. धडक इतकी जोरात होती की बसच्या दर्शनी भागाचे मोठे नुकसान झाले आहे.

​विद्यार्थिनींची प्रकृती धोक्याबाहेर

​अपघाताची माहिती मिळताच परिसरातील नागरिकांनी मदतीसाठी धाव घेतली. जखमी झालेल्या १२ विद्यार्थिनींना तातडीने जळगाव जामोद ग्रामीण रुग्णालयात दाखल करण्यात आले. सुदैवाने, सर्व विद्यार्थिनींना किरकोळ दुखापत झाली असून प्राथमिक उपचारानंतर त्यांना घरी सोडण्यात आले आहे.

​लोकप्रतिनिधींकडून विचारपूस

​घटनेची माहिती मिळताच आमदार संजय कुटे यांच्या पत्नी अपर्णाताई कुटे यांनी तातडीने ग्रामीण रुग्णालयात जाऊन जखमी विद्यार्थिनींची भेट घेतली आणि त्यांच्या प्रकृतीची विचारपूस करत धीर दिला.

​आगाराकडून आर्थिक मदत, पण सुरक्षेचे काय?

​जळगाव जामोद आगार प्रमुख पवन टाले यांनी माहिती दिली की, जखमी झालेल्या प्रत्येक विद्यार्थिनीला आगारामार्फत तात्काळ १,००० रुपयांची मदत देण्यात आली आहे. मात्र, याप्रकरणी अद्याप पोलीस ठाण्यात कोणत्याही गुन्ह्याची नोंद झालेली नाही.

​जनक्षोभ: जळगाव जामोद आगारातील अनेक बसेसची अवस्था अत्यंत दयनीय झाली आहे. 'खटारा' बसेसमुळे प्रवाशांचा आणि विद्यार्थ्यांचा जीव टांगणीला लागला आहे. या अपघातानंतर एसटी प्रशासनाविरुद्ध संताप व्यक्त केला जात असून, नादुरुस्त बसेस बदलण्याची मागणी जोर धरत आहे.